Abdullah Tamamlar – Neyleyem Ol Şahsı

Abdullah Tamamlar Neyleyem Ol Şahsı İlahi Sözü

Neyleyem ol şahsı ben kim ‘ilm ü ‘irfân olmaya,
Akl-ı evvel olmayup ol bir ulu kân olmaya.
El çeküp ak u karadan levh-i dilden ders alup,
Bakmayup i’râb u harfe ehl-i Kur`ân olmaya.

Girmeyüp bâğ-i bihişte nefsin ârâm itmeyüp,
Ola ol ehl-i cehennem varlığı fân olmaya.
El çeküp âhir cihândan kulluğun ifnâ idüp,
Cismi merkeb ‘aklı râkib kendi sultân olmaya.

Bilmediğin bilüp ol kes anlayup mikdârını,
Ehl-i ‘irfânın yolunda kul u kurbân olmaya.
Bu mudur ‘ilm ü me’ânî kim ‘ilimden dem urup,
Kala âhir cehl içinde genc-i Rahmân olmaya.

Müslime mü’min dimezler ol sebebden zâhidâ,
Nefsin idrâk eyleyüp ol küfrü îmân olmaya.
Mü’min oldur ‘âlem içre müslümândan fark olup,
Kavlini inkâr idüp tekrar müselmân olmaya.

Kimdir o mü’minler ki îmân itmeye ger nazmına,
Ref’ olup buğz u ‘adâvet Hakk’dan ihsân olmaya.
Mazhar-ı Hakk olsa bir kes anı inkâr eyleyen,
Bulmayup îmân-ı kâmil vasl-ı cânân olmaya.

Dürr-i yektâ olmayanlar zîr-i destimde benim,
Eyleyüp kat’-ı menâzil bahr-ı ‘ummân olmaya.
Keç bakanlar nazmım üzere şöyle bil kim zâhidâ,
Ola bir derde giriftâr ana dermân olmaya.

Ben ana açmam nikâbı kim budur kâr-ı ezel,
Hasretimden can virüp ol gözleri kân olmaya.
Nakşiyâ nazmın senin fehm olmaya ‘âlemde ger,
İmdi anı şöyle bil kim sana akrân olmaya.