Abdullah Tamamlar – Bir Marazı Mühlik

Abdullah Tamamlar Bir Marazı Mühlik İlahi Sözü

Bir maraz-ı mühlik sardı cihânı,
Bu derdin âşikâr dermânı yokdur.
Vîrân oldu halkın dâru’l-emânı,
Zâhirde ta’mîre imkânı yokdur.

Ebnâ-yı Âdem’in dâr-ı dünyâda,
Kalmadı râhatı mülk-i fenâda.
Herkes helâkine olmuş âmâde,
Bugün selâmetin nişânı yokdur.

Nûr-i Muhammedî gözlerden gitdi,
Kalblerden tevhîdin esrârı yitdi.
Hidâyet diyânet se’âdet bitdi,
Ekser-i islâmın irfânı yokdur.

Îmân islâm kaldı binde bir ferdde,
O da gark olmuşdur bu bahr-i derdde.
Dürr-i himmet vardır ba’zı bir merdde,
Anın da elinde meydânı yokdur.

Rûy-i zemîn rû-siyâhdır âşikâr,
Fısk u fesâd ile dolmuş bî-şümâr.
İ’tibâr bulmuşdur rezîl cefâkâr,
Şeytân olan nâsın şeytânı yokdur.

Bin üç yüz otuz bir târih-i hicret,
Kalmadı islâmda ‘adâlet gayret.
Tard ü teb’id oldu erbâb-ı himmet,
Hele fütûhâtın derbânı yokdur.

Fakîr hakîr sıbyan pây-mâl oldu,
Zulm ü hakâretle âsumân doldu.
Gülistân-ı dînin gülleri soldu,
Tarîk-ı Kur`ân’ın kurbânı yokdur.

Lutfiyâ der yandım yakıldım n’idem,
Bu bahr-i la’netde nereye gidem.
Îmân gider küfür gelir dem-be-dem,
Mü’mine ölmenin ziyânı yokdur.