Abdullah Tamamlar – Aşık Oldum Ta Ezel

Abdullah Tamamlar Aşık Oldum Ta Ezel İlahi Sözü

Âşık oldum tâ ezel bir Yûsuf-i Ken’ân’a ben,
Minnet etmem dü cihân cânân için bir câna ben.
Vuslat-ı ıyd-i hilâl gözler bu dîvâne gönül,
Hâzırım her lahzada bu cânımı kurbâna ben.

Cân fedâ etmek yolunda cânıma ayn-ı hayât,
Kul u kurbân intizâr etmekdeyim fermâna ben.
Benliğim benden alup benden bana izhâr olur,
İştiyâk etmem o anda ravza-i rıdvâna ben.

Derd-i aşk ile azâb olmak se’âdetdir bana,
Eylemem aslâ tenezzül hikmet-i Lokmân’a ben.
Geh zuhûr-i nûr-i envâr ile mahveyler beni,
Dâimâ hayrân olurum külle yevmin şe’n”a ben.

Kâh hilâl eyler beni akseyleyüp şems-i ezel,
Âşıkım ol bahr-ı nûrânîdeki bahrâna ben.
Sâmiyâ iklîm-i dil nâil olup dildârına,
Nâzırım nûr-i cemâl-i Hazret-i Sübhân’a ben.